தலைமைத்துவப் பண்புகளை வளர்க்கும் வகையில் மாணவர் மன்றக் கூட்டம்!
இந்து நடுநிலைப்பள்ளி, அரிகேசவநல்லூரில் ‘நிமிர்’ நிகழ்ச்சி சிறப்பாக நடைபெற்றது!
அரிகேசவநல்லூர், நவம்பர் 5:
திருநெல்வேலி மாவட்டம், அரிகேசவநல்லூர் இந்து நடுநிலைப்பள்ளியில் மாணவர்களிடம் தலைமைத்துவப் பண்புகளை வளர்க்கும் நோக்கில், ‘நிமிர் – தலைமைத்துவம்: மாற்றத்திற்கான முதல் படி’ என்ற தலைப்பில் மாணவர் மன்றக் கூட்டம் சிறப்பாக நடைபெற்றது.
நிகழ்ச்சியில் இறைவணக்கப் பாடலை மாணவி இன்பமுகிலா பாடினார். ஐந்தாம் வகுப்பு மாணவி சுபிக்ஷா வரவேற்புரையாற்றினார். நிகழ்ச்சியின் நோக்கம் மற்றும் தலைப்பின் முக்கியத்துவம் குறித்து பள்ளித் தலைமை ஆசிரியர் திரு. ராம்சந்தர் விளக்கிப் பேசினார்.
தொடர்ந்து, மாணவர்களின் தனித்திறமையை வெளிப்படுத்தும் வகையில் 13 மாணவர்கள் தலைமைத்துவத்தின் பல்வேறு பண்புகள் குறித்துப் பேசினர்.
ஆறாம் வகுப்பு மாணவிகள் பாரதி (சுயக்கட்டுப்பாடு), இசைசக்தி (பிறருக்கு மதிப்பளித்தல்), பிருந்தா (விடாமுயற்சி), காயத்ரி யாகினி (மாற்றத்தை ஏற்றுக்கொள்ளுதல்) ஆகியோரும், ஏழாம் வகுப்பு மாணவர்கள் அருண்ஸ்ரீ (தன்னம்பிக்கை), வெற்றிச்செல்வி (பொறுப்பேற்றல்), பானுமதி (குழுவாகச் செயல்படுதல்), ராமலட்சுமி (சிக்கல்களுக்குத் தீர்வு காணுதல்), ரேணுகா (உணர்வுகளைக் கையாளுதல்), சாதனா (நல்ல தாக்கத்தை ஏற்படுத்துதல்), சிவஜோதி (இலக்கை நிர்ணயித்தல்) ஆகியோரும் உரையாற்றினர்.
எட்டாம் வகுப்பு மாணவர்கள் இசக்கி பாண்டி நவீன் (சரியான முடிவெடுத்தல்), கார்த்திக் சரவணன் (தெளிவாகப் பேசுதல்) ஆகியோர் தங்களது கருத்துகளைச் சிறப்பாக எடுத்துரைத்தனர்.
சிறப்பு விருந்தினராகக் கலந்து கொண்ட வருவாய் ஆய்வாளர் திருமதி கோமதி கிருஷ்ணமூர்த்தி அவர்களை ஆசிரியை திருமதி ஜேஸ்மாலா மாணவர்களுக்கு அறிமுகப்படுத்தினார். தொடர்ந்து, தலைமைத்துவத்தின் அவசியம், ஒரு சிறந்த தலைவருக்குத் தேவையான பண்புகள், மாணவர்கள் தங்களது அன்றாட வாழ்க்கையில் தலைமைத்துவத்தை எவ்வாறு வளர்த்துக்கொள்ள வேண்டும் என்பன குறித்து திருமதி கோமதி கிருஷ்ணமூர்த்தி சிறப்புரையாற்றினார்.
இந்நிகழ்வில் All the Children Trust அமைப்பின் சார்பில் திரு. மதன் மற்றும் பாப்பாக்குடி நியூ லைப் மெட்ரிகுலேஷன் பள்ளியின் தாளாளர் திரு. பிரின்ஸ் ஆகியோர் கலந்து கொண்டு சிறப்பித்தனர்.
நிகழ்ச்சியில் தலைமைத்துவத் தலைப்புகளில் உரையாற்றிய அனைத்து மாணவர்களுக்கும் All the Children Trust அமைப்பின் சார்பில் பரிசுகள் வழங்கப்பட்டன.
நிறைவாக ஆசிரியை திருமதி முத்துச்செல்வி நன்றியுரையாற்றினார்.
மாணவர்களின் பேச்சாற்றல், தன்னம்பிக்கை, சிந்தனைத்திறன் மற்றும் தலைமைத்துவப் பண்புகளை வெளிப்படுத்தும் பயனுள்ள நிகழ்வாக இம்மாணவர் மன்றக் கூட்டம் அமைந்தது.